POESIA: LU TISTAMENTU

Figghi tutti, nori e niputi mia,
ascutati, ascutati anticchia a mia.
Cuncetta, addulurata,
veni a lu me capizzu,
va chiama a to frati Bastianazzu,
e lu fa iri a lu malasenu, lestu lestu,
quantu mi piagghia dà cosa cu du pizzu,
accussi vi fazzu un tistamentu rozzu,
pi spartiri ogni cosa ca vi lassu.
‘Ghiamu pi me figghiu Pinu,
ca ci lassu setti castagni frarici,
un litru di vinu,
pumaroru siccu, nu rasolu e n’accendinu
e li vigni d’arreri lu casalinu.
Poi c’è me fighhiu Pricopiu,
ci lassu muddica ammuffuta, acitu svintatu e
nu beddu varcocu, e pani cunsatu
pi manciarisillu drocu.
‘Ghiamu pi me figghia Maria,
ca ci lassu la campagna
o latu a chiddra mia,
c’un casalinu mezzu sdirrubbatu,
un puzzu senz’acqua e un canuzzu dispiratu
e pi campari avi a fari calumia.
Chistu è tutti chiddu chi posseru,
vi lu giuru supra a vita mia
e si n’un v’abbasta, nun chianciu e nun disperu,
e vogghiu sulu n’paci l’arma mia.